Në këtë Ditë të Përkujtimit të Holokaustit, Këshilli i Ambasadorëve Shqiptarë i bashkohet komunitetit ndërkombëtar për të nderuar kujtimin e gjashtë milionë hebrenjve dhe shumë të tjerëve që u vranë në mënyrë mizore nga regjimi Nazist gjatë një prej periudhave më të errëta të historisë Evropiane.
Ne gjithashtu nderojmë të mbijetuarit, që me forcën dhe qëndresën e tyre frymëzojnë breza të tërë.
Kjo ditë na kujton tragjeditë që lindin nga urrejtja, intoleranca dhe indiferenca. Është një mundësi për të riafirmuar angazhimin tonë ndaj parimeve të të drejtave të njeriut, dinjitetit dhe bashkëjetesës.
Jemi krenarë për historinë unike të Shqipërisë gjatë Luftës së II Botërore, ku shqiptarët, të udhëhequr nga kodi i tyre i nderit, Besa, rrezikuan jetët për të mbrojtur dhe strehuar familjet hebreje, duke treguar dhembshuri dhe guxim të jashtëzakonshëm.
Le të qëndrojmë të bashkuar në luftën kundër antisemitizmit, racizmit dhe çdo forme diskriminimi. Duke kujtuar të kaluarën, ne nderojmë viktimat dhe sigurojmë që mizori të tilla të mos përsëriten kurrë.
